नेपालमा उच्च शिक्षा अध्ययन, रोजगारी र घुमघामका लागि अस्ट्रेलिया जाने एक किसिमको परम्परा नै छ । हरेक वर्ष हजारौं नेपालीहरु अस्ट्रेलिया जाने गरेका छन् ।अस्ट्रेलियाको सामाजिक सुरक्षा, जीवनशैली र रहनसहनले नेपालीमात्र नभई विश्वका धेरै मुलुकका मानिसहरुलाई आकर्षित गर्ने गरेको छ । यस्तो अवस्थामा मानिसहरुलाई अस्ट्रेलियामा स्थायी बसोबास गर्नका लागि अस्ट्रेलियाले पीआरको व्यवस्था समेत गर्दै आएको छ ।
अस्ट्रेलियाले विभिन्न मुलुकका प्रतिभाशाली व्यक्तिहरुलाई समेत पीआर दिँदै आएको छ । यसका लागि तपाईंको प्रतिभाको मूल्यांकन गर्दै अस्ट्रेलियाले डिस्टिङगस् ट्यालेन्ट सबक्लास १२४ अन्तर्गतको भिसा उपलब्ध गराँउछ ।प्रतिभाका आधारमा अस्ट्रेलियाको पीआर पाउनका लागि विभिन्न ४ क्षेत्रहरु कला, खेलकुद, प्राज्ञिक एवं खोज अनुसन्धान र व्यक्तिगत व्यवसायलाई आधार मानिएको छ ।यसका लागि पीआरको अपेक्षा गर्ने व्यक्त अस्ट्रेलियाबाहिर बसोबास गरिरहेको हुनुपर्छ ।
आखिर के छन् त प्रतिभाको आधारमा अस्ट्रेलियाको पीआर पाउने आधार ?
# तपाईंमा असाधारण प्रतिभा भएको हुनुपर्छ । कला, खेलकुद, प्राज्ञिक एवं खोज अनुसन्धान वा व्यक्तिगत व्यवसायलाई अन्तर्राष्ट्रिय मान्यताप्राप्त संस्थाबाट सम्मानित भएको हुनुपर्छ ।
# तपाईं सोही व्यवसाय वा क्षेत्रमा सक्रिय रहेको हुनुपर्दछ र अस्ट्रेलियाले तपाईंलाई आफ्नो सम्पत्तिको रुपमा हेरेको हुनुपर्छ ।
# तपाईंलाई यसका लागि कुनै महत्वपूर्ण व्यक्ति वा संस्थाले मनोनयन गरेको हुनुपर्छ ।
# तपाईं अस्ट्रेलियाबाहिर बसोबास गरिरहेको हुनुपर्छ ।
# तपाईंको स्वास्थ्य र नैतिक आचरण समेत राम्रो रहेको हुनुपर्छ ।
# तपाईं अङ्ग्रेजी भाषामा निपुर्ण रहेको हुनुपर्छ ।
यस्तो योग्यता भएको खण्डमा अस्ट्रेलियामा स्थायी बसोबास गर्नका लागि भिसा पाइन्छ ।
डिस्टिङगस् ट्यालेन्ट सबक्लास १२४ अन्तर्गतको भिसा पाउनुका फाइदा
# भिसा पाएको व्यक्ति अस्ट्रेलियामा चीरकाल सम्मका लागि बसोबास गर्न सक्छ ।
# अस्ट्रेलियामा बसोबास गरिरहेका बेला आफ्नो क्षेत्रमा काम गर्न सक्छ ।
# भिसा पाएको मानिसले अस्ट्रेलियाको स्वास्थ्य कार्यक्रम मेडिकेयरमा समेत सहभागी हुन सक्छ ।
# स्थायी बसोबासका लागि आफ्ना आफन्तलाई समेत स्पन्सर गर्न सक्छ ।
# त्यसबाहेक निश्चित मापदण्ड पूरा गरेपछि अस्ट्रेलियाको नागरिकताका लागि समेत आवेदन दिन सक्छ ।
