आइतबार १० आषाढ २०८१

म्याकुरी उपनामले परिचित कमेडी कलाकार पवन खतिवडाले आफूमाथि लागेका घरेलु हिंसासहितका सबै आरोप झूठो भएको दावी गरेका छन् । अस्ति साँझ श्रीमती सुम्निमा खालिङले आफूलाई पवनले १० महिनासम्म सुधार केन्द्रमा बन्धक बनाएको, अर्की युवतीलाई गर्भवती बनाएको, आफ्नो गाडी र पैसा लिएको आरोप लगाएकी थिइन् ।

तर पवनले उक्त आरोपका खण्डन गरेका छन् । रोचक कुरा भने पवनसँग २५ लाखको बार्गेनिङ गर्न तेस्रो पक्षले डिल गरेको षड्यन्त्र पनि उनले खुलासा गरेका छन् । आफूले सुम्निामालाई १० महिनासम्म सुधार केन्द्रमा राखेको स्वीकार गरे पनि त्यसको कारण खुलाएका छन् ।

’सुधार केन्द्रमा राखेको सत्य हो । म भेट्न गइनँ । सिक्किमबाट उसको परिवार नआउदासम्म म जान्न भनेकै हो’, अगाडि भने, ’तर उसले भ्रम फैलाएजस्तो कुनै यातना दिएको छैन । प्रत्येक समय फोन गरेर मैले उसको हालखबर बुझेको छु । नपत्याए केन्द्रमा बुझ्न सकिन्छ ।’

तर सुम्निमाको जड्याहा प्रवृत्तिबाट आजित भएर महिला सुधार केन्द्रमा राखेको उनले बताए । मदिरा पिएपछि विनाकारण हातपात गर्ने बानीले सुधार केन्द्रमा राख्नु परेको उनको तर्क छ । तर सुम्निमा सुधार केन्द्रको भित्ता फोडेर भागेको पवनले बताए । यद्यपि, परिवारको सल्लाहमा भाउजु (सुम्निमा) लाई सुधार केन्द्रमा राखिएको पवनकी बहिनीले बताइन् ।

सुम्निामालाई मामा भनिएका ६० वर्षेले यौन शोषण गरेको थाहा पाउँदा पनि आफूले बिहे गरेको पवनको भनाई छ । उनले तथ्य खुलाउँदै भनेका छन्, ’मामालाई केस हाल्दिन्छु । त्यो मान्छेले हो मेरो जिन्दगी बर्बाद गर्ने, मलाई १३ वर्षमै यौन शोषण गर्यो भन्थी । तर कहाँ हुनु, अस्ति सुधार केन्द्रबाट भागेपछि त्यही मामाकोमा गएर बसेकी रैछ । पहिला पनि कुनै यौन शोषण थिएन, सहमतिमै लिभिङ टुगेदर थियो ।’

सुम्निमाकै कारण आफू डिप्रेसनमा गएको पवनको भनाई छ । नैतिकताको हिसाबले आफूले कहिल्यै हात नउठाएको तर श्रीमतीले बारम्बार आफूमाथि हातपात गरेको दुःखेसो पोखो । उनले भने, ‘काभ्रेमा सुटिङ भएका ख्याल ठट्टाका एपिसोडहरु ध्यान दिएर हेर्नुस्, जुम गरेर हेर्नुस्, अनुहारका चोटहरु मेकअपले सकी नसकी पुरेको छु ।’

आफूले पैसाकै निम्ति कहिल्यै सुम्निमामाथि गलत नियत नराखेको र गाडी तथा पैसा नलिएको दावी गरेका छन् । ’उसँग ४० लाख र गाडीको स्रोत के हो ? बाबुआमा सिक्किममा गरिब छन् । मामा भनाउँदो आफैं हरिकंगाल छ ।’

सुम्निमाको आमा र बहिनीबारे उनले भनेका छन्, ‘उसको बहिनी र आमालाई होटल नै खोल्देको थिएँ राधेराधेमा । होटलको नाम नै म्याकुरी सिक्किमे मःमः समथिङ के थियो । तर तिनीहरुले होटल नै बेचे र पैसा बोकेर हिँडे । मैले किनिदिएको सुनपनि सबै नक्कली बनाइन । त्यसपछि आएका प्रोब्लमहरु हुन् यी ।’

आफ्नो शुक्रकिटमा समस्या देखिएकाले श्रीमतीसँग बच्चाको प्लान नगरेको उल्लेख गर्दै अर्की युवती गर्भवती हुने कुनै सम्भावना नरहेको खुलासा पनि गरे ।
शुक्रकिटको समस्या सुनाए, ’हेल्पिङ हस्पिटलले दुई वर्ष पहिल्यै मेरो शुक्रकिटमा समस्या छ भनेको हो । सुम्निमासँगै फेम्ली प्लानिङ गर्दा तपाईंको बच्चा हुँदैन भनेर एउटा गन्हाउने औषधि प्रयोग गर्न दिएको थियो । अब मेरो शुक्रकिटले कसरी गर्भवती बनाउनु ?’

यता गर्भवती भएको भनिएकी युवती ऋतु बस्नेतले पनि मुख खोलेकी छन् । आफूले शर्मिला वाइवाको दबाबमा उक्त भिडियो बनाउन बाध्य भएको खुलासा गर्दै पवनसँग माफी मागेकी छन् ।

शर्मिलाले आफूलाई पैसाको लोभ देखाइ जर्बजस्ती भिडियोमा बोल्न लगाएको ऋतुको भनाई छ । भनिन्, ’सबैसँग माफी माग्न चाहन्छु । शर्मिला बाइवाले पवनसँग २५लाख माग्छु, आधा तँलाई, आधा मलाई भनेकी थिइ । त्यै पनि त्यो सुरुमा प्र्याङ्क भिडियो भनेकी थिइन् ।’


Last Updated on: February 22nd, 2024 at 6:18 pm
९१० पटक हेरिएको

तपाईको प्रतिक्रिया